අප අතරින් සමුගත් ප්රවීණ ගායිකා ආචාර්ය නන්දා මාලිනියගේ බාල දියණිය වන අමා සාරදා, මීට වසර දෙකකට පෙර (2024 දී) ‘ලක්හඩ’ නාලිකාවේ වැඩසටහනකට එක්වෙමින් තම මව පිළිබඳව සහ ඇගේ පෞද්ගලික ජීවිතය ගැන කළ අපූරු සංවාදයක සාරාංශයක් මෙසේය.
නන්දා මාලිනිය තම දරුවන්ට කිසිදු ආකාරයක බලපෑමක් කර නොමැති අතර, සාම්ප්රදායික දෙමාපිය භූමිකාවෙන් බැහැරව දරුවන්ට කැමති ක්ෂේත්රවල හැසිරීමට සම්පූර්ණ නිදහස ලබා දී තිබේ. නිවසට පැමිණෙන ප්රවීණ කලාකරුවන් සහ විද්වතුන් ඇසුරු කිරීමට කුඩා කල සිටම දියණියන්ට අවස්ථාව ලැබී ඇත.
තම මව ජනප්රියත්වයේ ඉහළම තැනක සිටියද, ඇය ගෙවා දැමූ මාවත කටුක හා අඳුරු එකක් වූ බව අමා සාරදා පවසයි. කුඩා කාලයේ ආර්ථික දුෂ්කරතා තිබුණද ආදරයේ අඩුවක් නොවූ බවත්, නමුත් තරුණ වියේදී ඇගේ මව සැබෑ ආදරය වින්දාද යන්න තමාට ගැටලුවක් බවත් ඇය සඳහන් කරයි. "මගේ අම්මා ආදරය ලැබිය යුතු කෙනෙක්. හැබැයි ඇය ආදරය නිසා විඳෙව්වා. අමරදේවයන් මියගිය දවසේ හැරුණුකොට මම අම්මා අඬනවා දැකලා නැහැ," යැයි ඇය පවසා ඇත.
පවන වැනි ප්රසංග සමයේ හිසට තුවක්කුවක් තබාගෙන සිටියදීත් රට වෙනුවෙන් ගීත ගායනා කළ නිර්භීත කාන්තාවක් ලෙස නන්දා මාලිනිය සිහිපත් කරන අමා සාරදා, ඒ සමයේ තර්ජන හමුවේ තමන්ද මුහුණ දුන් පීඩනකාරී වටපිටාව සිහිපත් කළාය. කෙසේ වෙතත්, එවැනි දුෂ්කර අවස්ථාවලදී මව වෙනුවෙන් සිදු කළ කැපකිරීම් ගැන තමා අද විශාල ආඩම්බරයක් සහ සතුටක් ලබන බව ඇය ප්රකාශ කරයි.
පණ්ඩිත් ඩබ්ලිව්.ඩී. අමරදේවයන් යනු නන්දා මාලිනිය නමැති ගැහැණිය ගොඩනැගූ ගුරුවරයා බවත්, අදටත් රූපවාහිනියක අමරදේවයන් පෙනී සිටින විට තම මවගේ මුහුණෙන් දිස්වන ගෞරවය අතිමහත් බවත් ඇය වැඩිදුරටත් පෙන්වා දී ඇත.