ආටෙමිස් II මෙහෙයුමේ ඓතිහාසික ගොඩබෑමෙන් අනතුරුව හූස්ටන් හි පිහිටි ජොන්සන් අභ්යවකාශ මධ්යස්ථානයේදී නාසා ආයතනය විසින් විශේෂ මාධ්ය හමුවක් පවත්වන ලදී. ලොව පුරා විසිරී සිටින මාධ්යවේදීන්ගේ සහභාගීත්වයෙන් පැවති මෙම අවස්ථාව සඳහා නාසා හි ප්රධානීන් රැසක් එක්ව සිටි අතර, එහිදී මෙහෙයුමේ අතිමහත් සාර්ථකත්වය, අභ්යවකාශ යානයේ ක්රියාකාරීත්වය සහ නාසා ආයතනයේ ඉදිරි සැලසුම් පිළිබඳව පුළුල් ලෙස සාකච්ඡාවට බඳුන් විය.
මෙම මාධ්ය හමුව ආරම්භ කරමින් නාසා සහකාර පරිපාලක අමිත් ක්ෂත්රියා මහතා අතිශය හැඟීම්බර අදහස් දැක්වීමක් සිදු කළේය. "ගගනගාමීන් ඔවුන්ගේ ජීවිත අපගේ විශ්වාසය මත තබා ඇති බව අප පෙර දින ප්රකාශ කළා, අද ඒ විශ්වාසය සියයට සියයක්ම තහවුරු වී තිබෙනවා," යනුවෙන් ඔහු පැවසීය. මිෂූඩ්, කෙනඩි සහ ස්ටෙනිස් යන මධ්යස්ථානවල සේවය කළ සියලුම ඉංජිනේරුවන්ගේ සහ කාර්මිකයන්ගේ අප්රතිහත ධෛර්යය සහ කැපවීම තත්පරයට අඩි 25,000ක වේගයෙන් පැමිණි මේ යන්ත්රය හරහා මනාව ඔප්පු වූ බවත්, වසර 53කට පසු මිනිසුන් යළිත් සඳට යැවීමේ පළමු පියවර මෙය බවත් ඔහු වැඩිදුරටත් අවධාරණය කළේය.
මෙහෙයුමේ නිල සහ අවසන් දත්ත මාධ්ය වෙත නිකුත් කිරීම පියාසැරි අධ්යක්ෂ රික් හෙන්ෆ්ලින් විසින් සිදු කරනු ලැබීය. ඒ අනුව ඔරායන් යානය ගමන් කළ මුළු දුර ප්රමාණය සැතපුම් 700,237ක් වූ අතර එහි උපරිම වේගය පැයට සැතපුම් 24,664ක් (පැයට කිලෝමීටර 39,692ක්) ලෙස සටහන් විය. ගමන් පථයේ නිරවද්යතාව අපේක්ෂිත කෝණයෙන් 0.04%ක් වැනි අතිශය සියුම් ඉලක්කයක් ගත් බවත්, පැසිෆික් සාගරයේ නියමිත ඉලක්කයේ සිට සැතපුමකටත් වඩා අඩු ආසන්න දුරකින් යානය ඉතා සාර්ථකව ගොඩබැස්සවූ බවත් ඔහු ඉමහත් සතුටින් ප්රකාශ කර සිටියේය.
මීළඟ අදියර වන ආටෙමිස් III (සඳ මත ගොඩබසින මෙහෙයුම) සම්බන්ධයෙන්ද මෙහිදී ප්රවෘත්ති ආයතන රැසක් ප්රශ්න යොමු කළහ. ඊට පිළිතුරු දෙමින් ඔරායන් වැඩසටහන් කළමනාකරු හොවාර්ඩ් හූ සඳහන් කළේ, මෙවර මෙහෙයුමේදී ඔරායන් යානය සඳහා භාවිත කළ කොටස් 286ක් පමණ මීළඟ මෙහෙයුම් සඳහාද නැවත භාවිතා කිරීමට අපේක්ෂා කරන බවයි. යානය නැවත කෙනඩි අභ්යවකාශ මධ්යස්ථානය වෙත රැගෙන ආ පසු එහි දත්ත සහ තාප පළිහ පිළිබඳව ඉතා ගැඹුරින් පරීක්ෂා කරන බවත්, ආටෙමිස් III සඳහා සහභාගී වන ගගනගාමීන්ගේ කණ්ඩායම ඉතා නුදුරේදීම ලෝකයට හඳුන්වා දෙන බවත් නාසා ප්රධානීහු තහවුරු කළහ.
මෙම මෙහෙයුමේ ඔවුන්ට අත්විඳීමට ලැබුණු අමතක නොවනම අවස්ථාවන් මොනවාදැයි මාධ්යවේදියෙකු නැගූ පැනයකට නාසා ප්රධානීන් ලබා දුන්නේ අපූරු පිළිතුරු පෙළකි. ප්රධාන පැරෂුට් තුන සාර්ථකව දිගහැරුණු මොහොත තමාගේ සුවිශේෂීම අවස්ථාව බව හොවාර්ඩ් හූ පැවසූ අතර, රොකට්ටුව අභ්යවකාශ ගත කළ අවස්ථාව ෂෝන් ක්වින්ගේ මතකයේ රැඳී තිබුණි. මියගිය 'කැරොල්' නමින් සඳෙහි ආවාටයක් නම් කිරීමට කළ ඉල්ලීම තමන්ට කිසිදා අමතක නොවන බව රික් හෙන්ෆ්ලින් පැවසූ අතර, ගගනගාමීන්ගේ පසුපසින් සඳ ගමන් කරමින් සූර්යග්රහණයක් සිදුවීම ආචාර්ය ලෝරි ග්ලේස්ට අමතක නොවන අත්දැකීමක් විය. මෙය පරීක්ෂණ පියාසැරියක් බැවින් කැබින් පීඩන පද්ධතියේ සහ වැසිකිළි පද්ධතියේ ඇතිවූ සුළු දෝෂ සාමාන්ය තත්ත්වයන් බවත්, පෘථිවි වායුගෝලයට ඇතුළු වීමේදී අපේක්ෂිත පරිදිම මිනිත්තු 6ක සන්නිවේදන ඇනහිටීමක් තත්පරයටම නිවැරදිව සිදුවීමෙන් ඔවුන්ගේ ගණනය කිරීම්වල නිරවද්යතාව තවදුරටත් තහවුරු වූ බවත් නිලධාරීහු පෙන්වා දුන්හ.
මාධ්ය හමුව නිමාවට පත් කරමින් හොවාර්ඩ් හූ විසින් ලොව පුරා සිටින දරුවන්ට වටිනා ආදර්ශයක්ද ලබා දෙන ලදී. "ස්ටාර් වෝර්ස් වැනි චිත්රපට නරඹමින් ආශාවෙන් සිටි කුඩා දරුවෙකුට, අද ඒ සියල්ල සැබෑවක් බවට පත්වනු දැකීමට ලැබීම ඊට වඩා දහස් ගුණයකින් වටිනවා," යැයි පවසමින් ඔහු දරුවන්ට තම සිහින හඹා යාමේ වැදගත්කම අවධාරණය කළේය. ඓතිහාසික ආටෙමිස් II මෙහෙයුම සාර්ථකව නිමා කරමින් මව්බිමට පැමිණි ගගනගාමීන් සිව්දෙනා ඉතා නුදුරේදීම හූස්ටන් නුවර වෙත පැමිණීමට නියමිත බව දන්වමින් මෙම විශේෂ මාධ්ය හමුව සාර්ථකව නිමාවට පත් විය.