දිට්වා සුළිකුණාටුවෙන් පසු සහන සහ ප්රතිසාධන කටයුතු සඳහා සහාය වීමේ උත්සාහයේ කොටසක් ලෙස අගෝස්තු මාසයේ ශ්රී ලංකා සංචාරයේදී අමතර විස්සයි20 අන්තර්ජාතික තරගාවලියක් ක්රීඩාකිරීමට ඉන්දියාව එකඟ වී ඇති බව ශ්රී ලංකා ක්රිකට් සභාපති ෂම්මි සිල්වා පැවසීය.
මේ සම්බන්ධයෙන් අදහස් දක්වමින් සිල්වා පැවසුවේ, ඉන්දීය ජාතික ක්රිකට් කණ්ඩායම මෙම වසර අගදී ඔවුන්ගේ අයිසීසී ලෝක ටෙස්ට් ශූරතා තරඟාවලිය සඳහා ශ්රී ලංකාවේ සංචාරය කරන විට අතිරේක විස්සයි20 තරඟද ක්රීඩාකරනු ඇති බවයි.
දිවයිනේ ප්රදේශ කිහිපයක විශාල හානියක් සිදුකළ දිට්වා සුළිකුණාටුවෙන් පසු ශ්රී ලංකාව සමඟ පවතින සහයෝගීතාවයේ දිගුවක් ලෙස මෙම තීරණය ගත් බවද ඔහු පැවසීය.
අගෝස්තු මාසයේදී පැවැත්වීමට නියමිත අතිරේක තරඟ, සහන සහ රට නැවත ගොඩනැගීමේ කටයුතු සඳහා අවශ්ය ආදායම සහ අවධානය උත්පාදනය කිරීමට උපකාරී වන බව සඳහන් කරමින්, ශ්රී ලංකා ක්රිකට් සභාපතිවරයා ඉන්දියාවේ සහයෝගයට කෘතඥතාව පළකළේය.
දිට්වා සුළි කුණාටුව ශ්රී ලංකාව පුරා ලක්ෂ සංඛ්යාත ජනතාවට බලපෑ අතර, දැඩි ගංවතුර සහ නායයෑම් ඇති කළ අතර නිවාස, යටිතල පහසුකම් සහ ජීවනෝපායන් සඳහා පුළුල් හානියක් සිදු කළේය.
අන්තර්ජාතික ක්රීඩාංගණ ගවේෂණය කිරීම සහ විදේශීය ක්රිකට් මණ්ඩල සමඟ සහයෝගයෙන් අරමුදල් රැස්කිරීමේ ක්රියාකාරකම් ඇතුළු සහන කටයුතු සඳහා සහාය වීම අරමුණු කරගත් වැඩසටහන් කිහිපයකට ශ්රී ලංකා ක්රිකට් ආයතනය සම්බන්ධ වී ඇත.
පාකිස්තානයට එරෙහිව ඉදිරියේදී පැවැත්වෙන අන්තර්ජාතික විස්සයි20 තරගාවලියෙන් උපයන ආදායම ගංවතුර සහන කටයුතු සඳහා පරිත්යාග කරන බව ද ශම්මි සිල්වා පැවසීය.