ඉරානය පුරා පැතිර යන රජයට එරෙහි විරෝධතා හේතුවෙන් මේ වන විට අවම වශයෙන් පුද්ගලයින් 116 දෙනෙකු මියගොස් ඇති අතර, තත්ත්වය තවදුරටත් උග්ර වෙමින් පවතින බව වාර්තා වේ.
මෙම විරෝධතා මධ්යයේ ඉරාන ජනාධිපති මසූඩ් පෙසෙෂ්කියන් ප්රථම වරට ජාතිය අමතමින් ප්රකාශ කර ඇත්තේ, මෙම විරෝධතා පිටුපස විදේශීය බලවතුන් හා සම්බන්ධ "ත්රස්තවාදීන්" සිටින බවයි. ඔවුන් පල්ලි ගිනිබත් කරන බවටත්, මහජන දේපළවලට පහර දෙන බවටත් ඔහු චෝදනා කළේය.
කෙසේ වෙතත්, ජනාධිපතිවරයා යම් සාමකාමී ස්වරූපයක් ද පෙන්නුම් කරමින්, ජනතාවගේ ආර්ථික ගැටලුවලට සවන් දීමට රජය සූදානම් බව ප්රකාශ කර ඇත. කැරලිකරුවන්ගෙන් සහ ත්රස්තවාදීන්ගෙන් ඈත් වන ලෙස ඔහු පුරවැසියන්ගෙන් ඉල්ලා සිටියේය.
මේ අතර, ඉරාන ජාතික ආරක්ෂක මණ්ඩලයේ ලේකම් අලි ලාරිජානි පවසා ඇත්තේ විරෝධතා සහ කැරලි අතර වෙනස හඳුනා ගැනීම අත්යවශ්ය බවත්, ආර්ථික දුෂ්කරතා මත පැන නැගුණු මුල් විරෝධතා සාධාරණ බවත්ය.
ජාත්යන්තර අවධානය ද මේ වන විට ඉරානය වෙත යොමු වී ඇත.
ඇමරිකානු රාජ්ය ලේකම් මාර්කෝ රුබියෝ සහ ඊශ්රායල අගමැති බෙන්ජමින් නෙතන්යාහු අතර ඉරානයට එරෙහිව විය හැකි ඇමරිකානු මැදිහත්වීමක් පිළිබඳව සාකච්ඡා වී ඇති බව වාර්තා වේ.
එමෙන්ම, ඉරානයට එරෙහිව එල්ල කළ හැකි විවිධ හමුදා ප්රහාරක විකල්ප පිළිබඳව ඩොනල්ඩ් ට්රම්ප් වෙත දැනුවත් කිරීම් සිදු කර ඇති බව ඇමරිකානු මාධ්ය වාර්තා කරයි.
ටෙහෙරානයේ හමුදා නොවන ස්ථානවලට හෝ විශාල පරිමාණයේ ගුවන් ප්රහාර එල්ල කිරීමේ විකල්ප ඒ අතර වන බව නිව්යෝර්ක් ටයිම්ස් පුවත්පත සඳහන් කර ඇත.
මෙම තර්ජන හමුවේ ඉරානය ද දැඩි ප්රතිචාර දක්වා ඇත. තමන්ට ප්රහාරයක් එල්ල වුවහොත් ඇමරිකානු සහ ඊශ්රායල කඳවුරුවලට ප්රතිප්රහාර එල්ල කරන බවට ටෙහෙරානය අනතුරු අඟවා තිබේ. ඉරාන පාර්ලිමේන්තුවේ මන්ත්රීවරුන් රැස්වී "ඇමරිකාවට මරණය" යනුවෙන් සටන් පාඨ කියමින් විරෝධය දක්වා ඇත.
බ්රිතාන්යය, ප්රංශය සහ ජර්මනිය ඇතුළු බටහිර රටවල් ඉරානයේ පවතින ප්රචණ්ඩත්වය පිළිබඳ සිය දැඩි කනස්සල්ල පළ කර ඇත. බ්රිතාන්ය ප්රවාහන ලේකම් හෙයිඩි ඇලෙක්සැන්ඩර් ප්රකාශ කළේ තමන් "සාමකාමී සංක්රමණයක්" අපේක්ෂා කරන බවත්, ඉරාන රජය සිය පුරවැසියන්ගේ මූලික නිදහස ආරක්ෂා කිරීමට කටයුතු කළ යුතු බවත්ය.
ඉරාන බලධාරීන් අන්තර්ජාලය විසන්ධි කිරීම මගින් විරෝධතාකරුවන් අතර සන්නිවේදනය අඩපණ කර ඇති බව ද විචාරකයෝ පවසති.