ඉතාලියේ සිසිලි දූපතේ කතෝලික පවුලක ඉපදී, සාමාන්ය ජීවිතයක් ගත කළ තරුණියක් බුදු දහම පිළිබඳව ඇති කරගත් ගැඹුරු අවබෝධය නිසාම සියල්ල අතහැර පැවිදි දිවිය තෝරාගත් අපූරු කතාවක් ගැනයි අදI Love Ceylon අපි ඔබට ගෙන එන්නේ.
ඇය නමින් මාර්ටිනා කැටානියා (Martina Catania) වන අතර, අද වන විට ඇයව අප හඳුන්වන්නේ 'ගෝතමී තෙරණිය' ලෙසිනි. 1999 වසරේ ජනවාරි 08 වැනිදා උපත ලැබූ ඇය, කිසිදු බෞද්ධ පසුබිමක් නොමැතිව හැදී වැඩුණත් කුඩා කාලයේ සිටම ආසියානු රටවල්, භාවනාව සහ ආධ්යාත්මික ජීවිතය ගැන විශේෂ උනන්දුවක් දැක්වූවාය.
පාසල් කාලයේදී ඇගේ ගුරුවරියකගෙන් තම ප්රදේශයේ පිහිටි ශ්රී ලාංකික බෞද්ධ විහාරස්ථානයක් ගැන දැනගැනීමට ලැබීම ඇගේ ජීවිතයේ ප්රධාන හැරවුම් ලක්ෂ්යය විය. එම විහාරස්ථානයට ගොස් බුදු දහම, භාවනාව, මෛත්රිය සහ මනස පිළිබඳව හැදෑරීම ආරම්භ කළ ඇය, බුදු දහම යනු හුදෙක් ආගමක් නොව ජීවිතය, දුක සහ ආශාවන් පිළිබඳ ගැඹුරු දර්ශනයක් බව වටහා ගත්තාය. ඇයගේ අධ්යාපන ගමනද සුවිශේෂී වන අතර, ඇය ඉතාලියේ නේපල්ස් විශ්වවිද්යාලයෙන් ආසියානු සහ අප්රිකානු භාෂා සහ සංස්කෘතීන් පිළිබඳ උපාධියක්ද ලබාගෙන තිබීම විශේෂත්වයකි.
බුදු දහම කෙරෙහි වූ දැඩි භක්තිය නිසාම ඇය 2022 වසරේදී මියන්මාරයට ගොස් පැවිදි පුහුණුව ලැබුවාය. එහිදී මැයි මාසයේදී මියන්මාරයේ විපස්සනා මධ්යස්ථානයකදී තාවකාලිකව 'සද්ධම්මුණි' යන නමින් පැවිදි දිවියක් ගත කළ ඇය, පසුව 2022 දෙසැම්බර් 09 වැනිදා වයස අවුරුදු 23දී අෂින් නායක (Ashin Nayaka) හිමියන්ගේ මඟපෙන්වීම යටතේ ථෙරවාද සම්ප්රදායට අනුව ‘ගෝතමී’ යන නමින් පැවිදි දිවියට ඇතුළත් වූවාය.
මෙහිදී විශේෂයෙන් සඳහන් කළ යුතු කරුණක් නම්, සමාජ මාධ්යවල ඇයව ‘භික්ෂුණිය’ ලෙස හැඳින්වූවත් 2026 වසරේ ට්රයිසිකල් (Tricycle) සඟරාවට අනුව ඇය තවමත් ථෙරවාද සම්ප්රදායේ පුහුණුව ලබන සාමණේර මෙහෙණින් වහන්සේ නමක් (Theravāda novice nun) ලෙස හැඳින්වීම වඩාත් නිවැරදි බවයි. ඇයගේ ධර්ම ප්රචාරක කටයුතු මියන්මාරයට පමණක් සීමා නොවූ අතර, ඇමරිකාවේ ටෙක්සාස් හි පිහිටි බෞද්ධ මධ්යස්ථානයකද කාලයක් වැඩවාසය කරමින්, 2023 දී ඉන්ඩියානාපොලිස් හි කාන්තා බෞද්ධ මධ්යස්ථානයක් ආරම්භ කිරීමටද ඇය පුරෝගාමී වූවාය.
පසුව ශ්රී ලංකාවට පැමිණි ගෝතමී තෙරණිය, සිංහල භාෂාව මනාව හදාරා සිංහලෙන් මෙන්ම ඉංග්රීසි, ඉතාලි, ස්පාඤ්ඤ සහ චීන යන භාෂාවලින්ද ධර්මය දේශනා කිරීම ආරම්භ කළාය. විශේෂයෙන්ම 2025 වසරේ සිට ලංකාවේ ප්රධාන රූපවාහිනී නාලිකා කිහිපයකම ධර්ම දේශනා වැඩසටහන් සඳහාද ඇය සම්බන්ධ වූවාය. අද වන විට විශේෂයෙන්ම තරුණ පරපුරට ගැලපෙන අයුරින් බුදු දහම ප්රායෝගික ජීවිතයට සම්බන්ධ කරගන්නා ආකාරය පිළිබඳව ඇය සමාජ මාධ්ය ඔස්සේද සරලව කරුණු පැහැදිලි කරන්නීය. සාමාන්ය විදෙස් තරුණියක ලෙස සිට බෞද්ධ පැවිදි ජීවිතයට ඇතුළත් වීම දක්වා ඇය ආ ගමන සහ අත්දැකීම් ඇතුළත් කරමින් 2026 වසරේදී ශ්රී ලංකාවේදී "Gotamī: A Life Rewritten by the Dhamma" නමින් ඇයගේ ජීවිත කතාව ඇතුළත් ග්රන්ථයක්ද ප්රකාශයට පත් කර තිබේ. ජාතිය, භාෂාව හෝ දේශ සීමා කිසිවක් සැබෑ ලෙසම ධර්මය සොයා යන මිනිසෙකුට බාධාවක් නොවන බවට ඉතාලියේ උපන් ගෝතමී තෙරණියගේ මෙම අපූරු ජීවන ගමන අප සැමට ලබා දෙන්නේ කදිම ආදර්ශයකි.