හංවැල්ල, මීගොඩ සහ කොස්ගම ඇතුළු ප්රදේශ රැසක ව්යාපාරිකයන්ගෙන් කප්පම් ගැනීම්, බලහත්කාරයෙන් ඉඩම් අත්පත් කරගැනීම් සහ කොන්ත්රාත් ඝාතන රැසකට වගකිවයුතු ප්රබල සංවිධානාත්මක අපරාධ කල්ලි නායකයෙකු වන ලලිත් කන්නන්ගර හෙවත් 'බස් ලලිත්' ඩුබායිහිදී අත්අඩංගුවට ගෙන මෙරටට රැගෙන ඒමට පියවර ගැනීමත් සමඟ, දීර්ඝ කාලයක් තිස්සේ පාතාල භීෂණයට ලක්ව සිටි හංවැල්ල ප්රදේශයේ ජනතාව සහ ව්යාපාරික ප්රජාව රජයට මෙන්ම ආරක්ෂක අංශ වෙත සිය හිස නමා ආචාරය සහ ස්තූතිය පළ කර සිටිති.
ජාත්යන්තර පොලීසියේ රතු නිවේදන පවා නිකුත් කර තිබූ මෙම නීතිවිරෝධී අපරාධකරු කොටුකර ගැනීමට හැකිවීම, ප්රදේශයේ කාලාන්තරයක් තිස්සේ පැවැති බියෙන් සැකෙන් තොර පරිසරය අවසන් කිරීමේ තීරණාත්මක සංධිස්ථානයක් ලෙස සැලකේ.
රාජ්ය බුද්ධි සේවය, අපරාධ පරීක්ෂණ දෙපාර්තමේන්තුව සහ මධ්යම අපරාධ විමර්ශන කාර්යාංශය එක්ව ඩුබායි පොලීසිය සමඟ සිදුකළ ඒකාබද්ධ මෙහෙයුමක ප්රතිඵලයක් ලෙස මෙලෙස අත්අඩංගුවට පත් සැකකරු, ඩුබායි රාජ්යයේ සිට පවා මෙරට ව්යාපාරිකයන්ට මෙන්ම පොලිස් නිලධාරීන්ට මරණ තර්ජන එල්ල කරමින් අපරාධ ජාලයක් මෙහෙයවා ඇති බව විමර්ශනවලදී අනාවරණය වී ඇත.
අපරාධකරුවන් විදෙස් රටවල සැඟව සිටිමින් මෙරට ව්යාපාරිකයන් ඉලක්ක කරගනිමින් සිදුකළ සංවිධානාත්මක කප්පම් ජාලයන් බිඳහෙළීමට ආරක්ෂක අංශ සමත් වීම, ජාතික මට්ටමින් නීතියේ ආධිපත්යය තහවුරු කිරීමටත්, ප්රදේශයේ ආර්ථික හා ව්යාපාරික කටයුතු නැවත යථා තත්ත්වයට පත්කිරීමටත් මහත් පිටිවහලක් වී තිබේ.
විදේශගතව සිටිමින් මෙරට තුළ පාතාල ක්රියාකාරකම් මෙහෙයවූ ප්රබල අපරාධකරුවන් රැසක් මෙලෙස එකිනෙකා ජාත්යන්තර පොලීසියේ සහාය ඇතිව මෙරටට ගෙනවිත් නීතිය හමුවට පැමිණවීම, ඉදිරියේදී සංවිධානාත්මක අපරාධ නිරුද්ධ කිරීමේ ජාතික ආරක්ෂක වැඩපිළිවෙළට ලැබුණු දැවැන්ත ජයග්රහණයකි.
මෙම ක්රියාවලිය ඉදිරියටත් නොපසුබටව ක්රියාත්මක කිරීම තුළින් කලාපීය අපරාධ කල්ලි මුලිනුපුටා දැමීමටත්, ව්යාපාරිකයන්ට හා සාමාන්ය ජනතාවට බියෙන් තොරව ජීවත්වීමේ පරිසරයක් තහවුරු කිරීමටත් පොලිස් දෙපාර්තමේන්තුව ඇතුළු සියලු රාජ්ය ආරක්ෂක අංශ අඛණ්ඩව කටයුතු කරනු ඇතැයි අපේක්ෂා කෙරේ.