ඉරාන නාවික හමුදාව එල්ල කළ කෲස් මිසයිල ප්රහාරයක් හේතුවෙන් ඇමෙරිකා එක්සත් ජනපදයට අයත් 'USS ඒබ්රහම් ලින්කන්' (USS Abraham Lincoln) දැවැන්ත ගුවන් යානා වාහක නෞකාවට සිය ගමන් මාර්ගය වෙනස් කිරීමට සිදු වූ බව ඉරාන රජයේ මාධ්ය ඊයේ (25) වාර්තා කළේය.
ඉරාන නාවික හමුදාව නිකුත් කළ නිල නිවේදනයකට අනුව, වෙරළාශ්රිතව ස්ථාපනය කර ඇති අධිබලැති 'කාදර්' (Qader) වර්ගයේ නෞකා නාශක මිසයිල පද්ධති භාවිතයෙන් මෙම ප්රහාරය එල්ල කර තිබේ. මෙමඟින් ඇමෙරිකානු නාවික බලඇණියේ ආරක්ෂාව පිළිබඳව බරපතළ ප්රශ්න මතු වී ඇත.
ඉරාන නාවික හමුදා ප්රධානී අද්මිරාල් ෂහ්රම් ඉරානි මහතා ප්රකාශ කර ඇත්තේ ඇමෙරිකානු නෞකා සමූහයේ සෑම ගමන් බිමනක් පිළිබඳවම ඉරානය ඉතා දැඩි අවධානයෙන් පසුවන බවයි. අදාළ නෞකා සමූහය ඉරාන මිසයිල පරාසය තුළට පැමිණි වහාම තවදුරටත් ප්රබල ප්රහාර එල්ල කරන බවට ඔහු අනතුරු ඇඟවීය.
මෙම ප්රහාරයත් සමඟ 'USS ඒබ්රහම් ලින්කන්' නෞකාවට සිය මුල් පිහිටීමෙන් ඉවත් වී ආරක්ෂිත කලාපයකට පසුබැසීමට සිදු වූ බව ඉරාන පාර්ශ්වය තවදුරටත් අවධාරණය කරයි.
මැදපෙරදිග මුහුදු කලාපයේ පවතින මෙම උණුසුම් තත්ත්වය හේතුවෙන් ගෝලීය නාවික ගමනාගමනයට සහ තෙල් ප්රවාහනයට දැඩි බාධා එල්ල වී තිබේ.
ඇමෙරිකානු නාවික හමුදාව මේ සම්බන්ධයෙන් මෙතෙක් නිල ප්රකාශයක් නිකුත් කර නැතත්, මෙම සිදුවීම කලාපීය යුද්ධය තවදුරටත් දරුණු අතට හැරවීමට හේතුවනු ඇතැයි ආරක්ෂක විශ්ලේෂකයෝ බිය පළ කරති. විශේෂයෙන්ම හෝර්මුස් සමුද්ර සන්ධිය ආශ්රිතව නාවික ගැටුම් වර්ධනය වීම ලෝක ආර්ථිකයට සෘජු බලපෑමක් එල්ල කරනු ඇත.