මැදපෙරදිග පවතින දැඩි යුදමය නොසන්සුන්තාවය තෙවන සතියටත් එළඹෙමින් තිබියදී, ලොව පුරා පිහිටි විනෝදාස්වාද සහ සංචාරක මධ්යස්ථාන වෙත ප්රහාර එල්ල කරන බවට ඉරානය නව අනතුරු ඇඟවීමක් සිදු කර තිබේ.
ඉරාන හමුදාව ප්රකාශ කර ඇත්තේ තමන්ගේ සතුරන් ගැවසෙන උද්යාන, නිවාඩු නිකේතන සහ සංචාරක ගමනාන්ත මින් ඉදිරියට ආරක්ෂිත නොවන බවයි. මෙම තත්ත්වය හමුවේ අතිරේක මැරීන් භටයන් 2,500ක් සහ ප්රහාරක නෞකා තුනක් කලාපයට යැවීමට ඇමරිකාව පියවර ගෙන ඇත.
ජනාධිපති ඩොනල්ඩ් ට්රම්ප් මෙහෙයුම් ලිහිල් කිරීමට (winding down) සූදානම් බව මීට පෙර ඉඟි කළ ද, දැනටමත් මැදපෙරදිග කලාපයේ රඳවා සිටින 50,000කට අධික ඇමරිකානු සෙබළුන් පිරිසට මෙම නව බලඇණි ද එක් වීමට නියමිතය. මේ අතර, සෞදි අරාබිය, කුවේටය, බහරේනය, කටාර් සහ එක්සත් අරාබි එමීර් රාජ්යය විසින් ඉරානයේ සිට එල්ල වූ බව කියන ඩ්රෝන සහ මිසයිල ප්රහාර කිහිපයක් සාර්ථකව මැඩපවත්වා ඇති නමුත්, කුවේටයේ තෙල් පිරිපහදුවක ගින්නක් හටගෙන ඇති බව ද වාර්තා වේ.
බලශක්ති වෙළෙඳපොළ කෙරෙහි ද මෙහි බලපෑම දැඩිව එල්ල වී ඇති අතර, බ්රෙන්ට් (Brent) බොරතෙල් බැරලයක මිල ඇමරිකානු ඩොලර් 112 දක්වා ඉහළ ගොස් තිබේ. තෙල් මිල පාලනය කිරීම සඳහා අප්රේල් 19 දක්වා බලපැවැත්වෙන පරිදි ඉරාන තෙල් නැව් සඳහා පනවා තිබූ සම්බාධක ලිහිල් කිරීමට ට්රම්ප් පාලනය පියවර ගෙන ඇති වුවද, ඉරානයේ න්යෂ්ටික සහ බලශක්ති මධ්යස්ථාන වෙත ඊශ්රායලය සහ ඇමරිකාව එල්ල කළ ප්රහාරවලින් සිදු වූ හානිය තවමත් නිශ්චිතව අනාවරණය වී නොමැත.