උතුරු කොරියානු නායක කිම් ජොන් අන් සහ ඔහුගේ නව යොවුන් වියේ පසුවන දියණිය යුද පුහුණු අභ්යාසයක නිරත වන අයුරු දැක්වෙන දර්ශන එරට රාජ්ය මාධ්ය විසින් ඊයේ (20) ප්රකාශයට පත් කර තිබේ. එහි විශේෂත්වය වන්නේ කිම් ජොන් අන්ගේ දියණිය වන 'කිම් ජු-ඒ' (Kim Ju-ae) යුද ටැංකියක් පදවන අයුරු එහි නිරූපණය වීමයි. මෙය ඇය අනාගතයේදී උතුරු කොරියාවේ නායකත්වයට පත්වීමේ සූදානමක් බවට විදෙස් දේශපාලන විචාරකයන් අතර දැඩි කතාබහක් නිර්මාණය කර ඇත.
රාජ්ය මාධ්ය නිකුත් කළ වීඩියෝ දර්ශනවලට අනුව, පියා සහ දියණිය දෙදෙනාම කළු පැහැති ලෙදර් ජැකට් හැඳ සිටින අතර, ඔලිව් කොළ පැහැති යුද ටැංකියක හැච් එකෙන් හිස එළියට දමාගෙන කිම් ජු-ඒ එය පදවන අයුරු දැකගත හැකිය. දකුණු කොරියානු ආරක්ෂක විශේෂඥයෙකු වන ලී ඉල්වූ (Lee Illwoo) පවසන්නේ, නවීන යුද ටැංකි හැසිරවීම පහසු බැවින් සහ ඇය සමතලා පොළොවක ඉතා අඩු වේගයකින් එය පදවා ඇති බැවින් එය ඇයට අපහසු කාර්යයක් නොවන්නට ඇති බවයි.
පසුගිය 2022 වසරේ නොවැම්බර් මාසයේදී පළමු වරට ප්රසිද්ධියට පත් වූ කිම්ගේ දියණිය, මෑත මාස කිහිපය තුළ මිසයිල පරීක්ෂණ, යුද පෙළපාලි සහ කර්මාන්තශාලා විවෘත කිරීම් වැනි ඉහළ පෙළේ මිලිටරි ඉසව් කිහිපයකදීම සිය පියා සමඟ පෙනී සිටියාය. උතුරු කොරියානු රාජ්ය මාධ්ය මෙතෙක් ඇයගේ නම ප්රකාශයට පත් කර නොමැති අතර, ඇයව හඳුන්වනු ලබන්නේ කිම් නායකයාගේ "ගෞරවනීය" හෝ "වඩාත්ම ආදරණීය" දරුවා ලෙස පමණි.