විවිධ හේතු මත මියගිය කුකුළන්ගේ මස් නීති විරෝධී ලෙස විකිණීමේ ජාවාරමක් මහජන සෞඛ්ය පරීක්ෂකවරුන් විසින් පල්ලම ප්රදේශයේ දී වටලා තිබේ.
එහිදී සැකකරුවන් දෙදෙනෙකු අත්අඩංගුවට ගෙන තිබූ අතර ප්රදේශ කිහිපයකට බෙදා හැරීම සඳහා තිබූ මස් විශාල තොගයක් ද අත්අඩංගුවට ගෙන ඇත.
පල්ලම සහ ඒ අවට කුකුළු ගොවිපළවල විවිධ රෝග හේතුවෙන් මියගිය කුකුළන් සත්ව ආහාර සඳහා ප්රවාහනය කරන මුවාවෙන් එකතු කිරීම සම්බන්ධයෙන් සැකකරුවන්ට චෝදනා එල්ල විය.
එම කුකුළන් මස් සකස් කර, අනාවරණ වීම වළක්වා ගැනීම සඳහා පොලිතින් බෑග්වල ඇසුරුම් කර, ආණමඩුව, නවගත්තේගම, සාලියවැව, පාලියාගම, බිංගිරිය, වීරපොකුණ, මදුරන්කුලිය සහ ආරච්චිකට්ටුව ඇතුළු ප්රදේශ කිහිපයක හෝටල්, පුණ්ය ආයතන සහ විවාහ උත්සව සංවිධායකයන්ට අඩු මිලට අලෙවි කර ඇති බව හෙළිවී තිබේ.
ලැබුණු තොරතුරක් මත පල්ලම මහජන සෞඛ්ය පරීක්ෂකවරුන් විසින් කරන ලද දීර්ඝ විමර්ශනයකින් පසුව මෙම වැටලීම සිදුකර තිබිණි.
ත්රිරෝද රථයකින් මස් ප්රවාහනය කරමින් සිටි සැකකරුවන් පල්ලම, සේරුකැලේ පශු වෛද්ය කාර්යාලය අසලදී අත්අඩංගුවට ගෙන ඇති අතර, පොලිතින්වල සඟවා තිබූ මස් කිලෝග්රෑම් 120ක් පමණ එහිදී සොයාගෙන ඇත.
අත්අඩංගුවට ගත් එක් අයකු ජා-ඇල, දුඩුගම පදිංචි ගීකියනගේ ජානක ගීත් කුමාර් පෙරේරා ලෙස හඳුනාගෙන ඇති අතර, ඔහු කුකුළන් ගොවිපළවලින් එකතු කර ප්රවාහනය කර තිබේ.
මස් සැකසීමේ නිරත වූ අනෙක් පුද්ගලයා සේරුකැලේ පදිංචි යක්දෙහිගේ ජගත් ඉන්දික නිරෝෂන් ලෙස හඳුනාගෙන ඇත.
කිලෝග්රෑමයක් රුපියල් 800ක් වැනි අඩු මිලට ප්රධාන වශයෙන් කොත්තු සහ බත් කෑම පිළියෙළ කරන හෝටල්වලට අලෙවි කර ඇති බව විමර්ශනවලින් හෙළි විය.
සෞඛ්ය නිලධාරීන් ප්රකාශ කළේ මෙම ජාවාරම සැළකිව යුතු කාලයක් තිස්සේ ක්රියාත්මක වී ඇති අතර රැවටිලිකාර ක්රම මගින් ගැනුම්කරුවන් රවටා ඇති බවයි.
සැකකරුවන් ආණමඩුව මහේස්ත්රාත් අධිකරණයට ඉදිරිපත් කරන ලද අතර, එහිදී මහේස්ත්රාත් ආර්.එන්.කේ. චන්ද්රවංශ ඔවුන්ට රුපියල් 76,000 ක දඩයක් නියම කර අත්අඩංගුවට ගත් මස් තොගය විනාශ කිරීමට නියෝග කළේය.
වැටලීම සිදු කරන ලද්දේ පල්ලම පරිපාලන මහජන සෞඛ්ය පරීක්ෂක පී.ටී.ඒ.ආර්. ප්රනාන්දු, ආඬිගම මහජන සෞඛ්ය පරීක්ෂක ඒ.එම්.ඩී.සී. අධිකාරි සහ පල්ලම මහජන සෞඛ්ය පරීක්ෂක ආර්.ඒ.ඩී.පී. රණසිංහ එක්වයි.