මැදපෙරදිග කලාපය තුළ පවතින දැඩි නොසන්සුන්තාවය හමුවේ, ඉදිරි පැය 24 තුළ අමෙරිකා එක්සත් ජනපදය විසින් ඉරානයට එරෙහිව හමුදාමය මැදිහත්වීමක් සිදු කිරීමට ඉඩ ඇති බව යුරෝපීය නිලධාරීන් ප්රකාශ කර තිබේ.
අමෙරිකානු ජනාධිපති ඩොනල්ඩ් ට්රම්ප් මෙම තීරණය ගෙන ඇති බව පෙනී ගියද, එහි විෂය පථය සහ කාලය පිළිබඳව මෙතෙක් පැහැදිලි අනාවරණයන් සිදු වී නොමැත.
කලාපීය නොසන්සුන්තාවය තීව්ර වීමත් සමඟ, පූර්ව ආරක්ෂණ පියවරක් ලෙස කලාපයේ ප්රධාන කඳවුරුවලින් සිය පිරිස් ඉවත් කර ගැනීමට අමෙරිකා එක්සත් ජනපදය පියවර ගනිමින් සිටී.
අනන්යතාවය හෙළි නොකළ අමෙරිකානු නිලධාරියෙකු රොයිටර් පුවත් සේවයට පවසා ඇත්තේ මෙය හමුදා ඉවත් කිරීමක් නොව, හමුදා ස්ථානගත කිරීමේ වෙනසක් බවයි.
විශේෂයෙන්ම, මැදපෙරදිග පිහිටි විශාලතම අමෙරිකානු කඳවුර වන සහ සෙබළුන් 10,000ක් පමණ රඳවා සිටින කටාර්හි අල් උඩෙයිඩ් ගුවන් හමුදා කඳවුරේ සිටින ඇතැම් නිලධාරීන්ට ඉන් ඉවත් වන ලෙස උපදෙස් දී තිබේ.
මීට පෙර ජූනි මාසයේදී ඉරානයට එල්ල වූ අමෙරිකානු ගුවන් ප්රහාරවලට පෙරද මෙලෙස මැදපෙරදිග කඳවුරුවලින් නිලධාරීන් ඉවත් කර තිබූ බව වාර්තා වේ.
අමෙරිකානු ප්රහාරයක් එල්ල වුවහොත්, අමෙරිකානු හමුදා රඳවා සිටින අසල්වැසි රටවල පිහිටි කඳවුරුවලට ප්රහාර එල්ල කරන බවට ඉරානය දැඩි අනතුරු ඇඟවීමක් කර තිබේ.
සවුදි අරාබිය, එක්සත් අරාබි එමීර් රාජ්යය සහ තුර්කිය වැනි රටවල් වෙත ඉරානය දන්වා ඇත්තේ වොෂින්ටනය ඉරානයට පහර දෙන්නේ නම්, එම රටවල පිහිටි අමෙරිකානු කඳවුරු ඉලක්ක කරන බවයි.
මේ අතර, අමෙරිකානු ජනාධිපතිවරයා ප්රකාශ කර ඇත්තේ ඉරානය පළිගැනීමට උත්සාහ කළහොත් මීට පෙර කවදාවත් නොදුටු මට්ටමේ ප්රතිචාරයකට ඔවුන්ට මුහුණ දීමට සිදුවනු ඇති බවයි.
පවතින තත්ත්වය මත අමෙරිකාවට අමතරව බ්රිතාන්යය ද කටාර්හි පිහිටි සිය ගුවන් කඳවුරකින් නිලධාරීන් ඉවත් කර ගැනීමට පියවර ගෙන ඇත. මීට අමතරව පෝලන්තය, ඉතාලිය සහ අමෙරිකාව සිය පුරවැසියන්ට වහාම ඉරානයෙන් ඉවත් වන ලෙසත්, තුර්කිය හෝ ආර්මේනියාව හරහා ගොඩබිම් මාර්ගයෙන් පිටව යන ලෙසත් දැනුම් දී තිබේ.
මේ අතර, ඉරාන විදේශ අමාත්යවරයා සහ අමෙරිකානු විශේෂ නියෝජිතයා අතර පැවැත්වීමට නියමිතව තිබූ සාකච්ඡා අත්හිටුවා ඇති අතර, ඉරාන නිලධාරීන් සමඟ පැවැත්වීමට තිබූ සියලුම හමුවීම් අවලංගු කළ බව ජනාධිපති ට්රම්ප් තහවුරු කර ඇත.